Ministry of Justice

Ministri i Drejtësisë, Toni Gogu, prezantoi sot në seancë plenare buxhetin e institucioneve të drejtësisë dhe të Ministrisë së Drejtësisë për vitin 2027, në vlerën 29.6 miliardë lekë, 1.2 për qind më shumë se sivjet. Gogu e lidhi buxhetin me raportin e fundit të Komisionit Europian për Shqipërinë, duke thënë se e lexon atë jo si listë sulmesh, por si listë detyrash.

Gogu u ndal te pesë ndryshime që buxheti sjell për qytetarët. I pari është ndihma juridike falas, ku këtë dhjetor parashikohet hapja e pesë zyrave të reja, në Kamëz, Krujë, Librazhd, Bulqizë dhe Rrëshen. Më pas gjatë 2027 do të hapen zyra edhe në Divjakë, Mallakastër, Gramsh, Devoll dhe Malësi të Madhe. I dyti lidhet me të miturit: synimi është që qendra e Mëzezit për edukimin dhe rehabilitimin e tyre të vihet në funksion në vitin 2027. “Një dosje penale përshkruan një ngjarje. Nuk përshkruan gjithë të ardhmen e një fëmije”, tha ministri.

I treti është Shërbimi i Provës, që merr 66 për qind më shumë fonde për të ulur rrezikun e rikthimit në krim, si dhe për herë të parë një fond për mbikëqyrjen elektronike. I katërti është prona: 2,366 familje që presin kompensimin për pronat informale që nga viti 2008 synohet të marrin pagesën e fundit në 2027. I pesti është spitali i mjekimit të detyruar në Lezhë, për të cilin janë parashikuar 250 milionë lekë vitin e ardhshëm dhe 1.14 miliardë lekë për tre vjet. “Një njeri që gjykata e ka dërguar për mjekim nuk është i dënuar. Është pacient”, theksoi Gogu.

Ministri u ndal edhe te raporti i Komisionit Europian për Shqipërinë, i publikuar dy javë më parë, i cili, sipas tij, thotë se Shqipëria ka bërë progres të mirë në funksionimin e gjyqësorit, ku vetingu i të gjithë gjyqtarëve dhe prokurorëve ka përfunduar dhe Prokuroria e Posaçme ka treguar pavarësi dhe rezultate. “Kjo nuk është meritë e një qeverie. Është meritë e institucioneve dhe e njerëzve që i mbajtën në këmbë”, u tha Gogu deputetëve.

Ministri iu përgjigj edhe kritikave të raportit. Për gjykatat, investimet në sistemin e drejtësisë rriten rreth 6 për qind, ndërsa sistemi i ri i menaxhimit të çështjeve po ndërtohet me mbështetjen e Bashkimit Europian. Për burgjet, ai pranoi se ritmi nuk ka qenë në lartësinë e ambicies. Për pagat e magjistratëve, Gogu tha se vendimi i Gjykatës Kushtetuese për ligjin e ri do të zbatohet, cilido qoftë. “Pavarësia e gjyqtarit nuk është privilegj i tij. Është garanci për qytetarin”, tha ai.

“Qytetari nuk do të na pyesë kur mbyllëm një kapitull. Do të na pyesë: a e gjeta avokatin kur më duhej?”, tha ministri në mbyllje, duke kujtuar synimin për mbylljen e negociatave me Bashkimin Europian në fund të 2027-s. Ai i ftoi deputetët e mazhorancës dhe të opozitës ta votojnë buxhetin dhe ta kontrollojnë zë për zë: “Për këtë buxhet kërkoj kontroll, jo duartrokitje.”