Fjala e Ministrit të Drejtësisë, Toni Gogu, në nisjen e programit për Fuqizimin e Aksesit në Drejtësi përmes praktikave të studentëve dhe mbështetjes së Shoqërisë Civile

E nderuar znj. Anna Sporrer,

Të nderuar përfaqësues të UNDP Albania,

Të nderuar partnerë nga Austrian Development Agency,

Të dashur studentë, përfaqësues të shoqërisë civile, kolegë,

Sot nuk është thjesht një ceremoni.

Është një moment ku drejtësia bëhet më konkrete.

Sepse drejtësia nuk fillon në sallën e gjyqit.

Fillon aty ku një qytetar ka nevojë për ndihmë dhe dikush është i gatshëm t’ia japë.

Ky program që sot nisim me praktikat e paguara për studentët e drejtësisë dhe me mbështetjen për organizatat e shoqërisë civile – është një përgjigje shumë e thjeshtë për një pyetje të vështirë:

Si e bëjmë drejtësinë të arritshme për të gjithë?

Jo me slogane.

Por me njerëz të trajnuar.

Me shërbime konkrete.

Me prani në terren.

Dua të falënderoj në mënyrë të veçantë Austrinë dhe znj. Sporrer.

Austria nuk është thjesht një partner teknik.

Është një vend që e ka jetuar vetë procesin europian dhe e kupton shumë mirë këtë fazë ku ndodhemi ne sot.

Një fazë që unë do ta quaja pa hezitim:

kilometri i fundit i integrimit.

Dhe në këtë kilometër të fundit, drejtësia nuk është më një kapitull negociatash.

Është një provë besimi.

Besimi i qytetarëve tanë.

Dhe besimi i Bashkimit Europian se Shqipëria nuk ka vetëm ligje të mira në letër, por funksionon në praktikë.

Programe si ky sot janë pikërisht kjo:

prova e funksionimit.

Kur një student hyn në sistem dhe mëson jo vetëm teorinë, por shërbimin.

Kur një organizatë e shoqërisë civile arrin tek një grua, një i mitur, një familje në nevojë dhe i jep zë përpara ligjit.

Këtu fillon Europa reale.

Jo në Bruksel.

Por në komunitetet tona.

Si Ministër i Drejtësisë, unë e shoh këtë si një drejtim shumë të qartë:

Ne nuk ndërtojmë vetëm institucione.

Ne ndërtojmë akses.

Dhe aksesi është masa më e ndershme e drejtësisë.

Sepse drejtësia që nuk arrihet, nuk është drejtësi.

Të dashur studentë,

Ju jeni ndoshta pjesa më e bukur e këtij programi.

Sepse ju hyni në sistem në një moment historik për vendin.

Në momentin kur Shqipëria nuk po përpiqet më të bindë askënd për qëllimet e saj europiane –

por po provohet për standardet e saj europiane.

Dhe këto standarde nuk mbahen nga ligjet.

Mbarten nga njerëzit.

Nga ju.

Dhe për ta mbyllur, dua të them diçka shumë të thjeshtë:

Nëse duam të jemi pjesë e Europës,

duhet të sigurohemi që çdo qytetar në Shqipëri të ndihet i mbrojtur nga ligji, jo i humbur përballë tij.

Ky është kuptimi i vërtetë i këtij programi.

Dhe ky është edhe kuptimi i fazës ku ndodhemi si vend.

Faleminderit të gjithëve për partneritetin, për besimin dhe për punën që po bëjmë së bashku.

Europa nuk është më një premtim.

Është një standard që po e ndërtojmë çdo ditë.