Fjala e Ministrit të Drejtësisë, Toni Gogu, në Konferencën Përmbyllëse të Projektit Twinning “Forcimi i Shkollës së Magjistraturës”

Të nderuar Ambasador Gonzato, Ambasador Suard, Ambasador Alberti, Ambasador Vos,

I nderuar Zoti Rakipi,

E nderuar Znj. Laudic Baron,

I nderuar Kryetar i Gjykatës së Lartë,

Të nderuar përfaqësues të KLGJ-së, KLP-së dhe institucioneve të drejtësisë,

Të dashur partnerë europianë,

Të nderuar kolegë,

Ku fillon drejtësia?

Shumë do të thoshin në sallën e gjyqit.

Të tjerë do të thoshin në Kushtetutë.

Disa do të thoshin në Kodet dhe ligjet që miraton Kuvendi.

Të gjitha këto janë të rëndësishme.

Por drejtësia fillon shumë më herët.

Fillon në auditorin ku formohet gjyqtari i ardhshëm.

Fillon në klasën ku trajnohet prokurori i ardhshëm.

Fillon në vendin ku një jurist i ri mëson se integriteti nuk është vetëm një kapitull në kurrikulë, por një mënyrë jetese profesionale.

Prandaj sot nuk jemi mbledhur thjesht për të mbyllur një projekt.

Jemi mbledhur për të reflektuar mbi një investim në njerëzit që do të mbajnë mbi supe drejtësinë shqiptare në dekadat që vijnë.

Dhe për këtë arsye dua të falënderoj Bashkimin Europian, partnerët tanë nga Franca, Italia dhe Holanda, si dhe drejtuesit e këtij projekti, për punën e bërë me përkushtim dhe profesionalizëm.

Ka periudha kur institucionet ndërtohen.

Dhe ka periudha kur ato fillojnë të japin fryt.

Mendoj se jemi pikërisht në një moment të tillë.

Vetëm pak ditë më parë, Shqipëria mori një vlerësim të rëndësishëm në rrugën e saj europiane.

IBAR-i u miratua në COELA dhe u konfirmua në COREPER.

Ky nuk është thjesht një moment procedural në procesin e negociatave.

Është një konfirmim se reformat e ndërmarra në drejtësi kanë prodhuar rezultate të matshme dhe të verifikueshme.

Megjithatë, do të ishte gabim ta interpretonim këtë si fundin e rrugës.

Përkundrazi.

Është dëshmi se po kalojmë nga një fazë e reformimit të sistemit në një fazë të konsolidimit të tij.

Nga ndërtimi i institucioneve, tek forcimi i kulturës së tyre profesionale.

Nga arkitektura e reformës, tek cilësia e njerëzve që do ta mbajnë atë në këmbë për dekadat që vijnë.

Dhe pikërisht këtu qëndron rëndësia strategjike e Shkollës së Magjistraturës.

Kur kam punuar si kancelar në Gjykatën e Tiranës, më shumë se dy dekada më parë, mësova një të vërtetë të thjeshtë.

Cilësia e drejtësisë nuk varet vetëm nga ligjet.

Varet nga njerëzit që i zbatojnë ato.

Dy vende mund të kenë ligje të ngjashme.

Dy gjykata mund të zbatojnë të njëjtat rregulla procedurale.

Por cilësia e drejtësisë ndryshon kur ndryshon cilësia e formimit profesional, e etikës dhe e kulturës institucionale.

Për këtë arsye, në çdo demokraci të konsoliduar europiane, shkollat e magjistraturës nuk konsiderohen institucione të zakonshme arsimore.

Ato konsiderohen institucione strategjike të shtetit të së drejtës.

Sepse nuk formojnë thjesht profesionistë.

Formojnë njerëzit që do të marrin vendime në emër të Republikës.

Projekti Twinning që po përmbyllim sot ka kontribuar pikërisht në këtë drejtim.

Ai ka ndihmuar Shkollën e Magjistraturës të forcojë kapacitetet e saj dhe të afrohet edhe më shumë me standardet më të mira europiane.

Janë rishikuar kurrikulat e trajnimit fillestar dhe të vazhdueshëm.

Është forcuar dimensioni praktik i formimit profesional.

Janë institucionalizuar trajnimet mbi etikën.

Është avancuar specializimi i magjistratëve.

Janë përmirësuar metodologjitë e mësimdhënies dhe të vlerësimit.

Dhe për herë të parë janë organizuar provime të ndara për kandidatët magjistratë dhe për ndihmësit ligjorë.

Në pamje të parë këto mund të duken ndryshime teknike.

Në të vërtetë, ato janë investime afatgjata në cilësinë e drejtësisë shqiptare.

Sepse drejtësia e vitit 2030 po formohet sot, në auditorët e kësaj shkolle.

Është po aq e rëndësishme të themi qartë se ky është para së gjithash suksesi i vetë Shkollës së Magjistraturës.

I drejtuesve të saj.

I stafit akademik dhe administrativ.

I trajnerëve.

I kandidat-magjistratëve.

Dhe i partnerëve europianë që kanë ndarë përvojën e tyre me bujari dhe profesionalizëm.

Roli i Ministrisë së Drejtësisë është i ndryshëm.

Ne sigurojmë kuadrin ligjor.

Mbështesim institucionet.

Garantojmë burimet e nevojshme.

Por cilësia e formimit profesional ndërtohet nga vetë institucioni.

Dhe kjo është pikërisht ajo që kërkojnë standardet europiane: Institucione të forta, profesionale dhe të afta të zhvillohen mbi bazën e meritës dhe integritetit.

Raporti i fundit i Bashkimit Europian e njeh progresin e bërë.

Por ai na kujton gjithashtu se reforma nuk matet vetëm me atë që kemi arritur.

Matet me aftësinë tonë për ta bërë këtë progres të qëndrueshëm.

Provimet e pranimit duhet të vazhdojnë të garantojnë transparencë dhe meritokraci.

Kurrikulat duhet të përmirësohen vazhdimisht.

Kapacitetet e brendshme të Shkollës duhet të forcohen më tej.

Dhe partneriteti europian duhet të vazhdojë.

Jo vetëm si detyrim, por si zgjedhje, sepse besojmë se standardi europian është standardi më i mirë për drejtësinë shqiptare.

Diku në këtë sallë mund të jetë ulur një kandidat-magjistrat që pas pak vitesh do të japë vendime në emër të Republikës së Shqipërisë.

Ndoshta sot është ende në hapat e parë të rrugëtimit të tij profesional.

Por çfarë e pret, e dimë.

Pikërisht për atë brez po bëjmë gjithë këtë punë.

Sepse në fund të fundit, institucionet ndërtohen me ligje.

Por besimi ndërtohet me njerëz.

Dhe njerëzit që do të mbajnë mbi supe drejtësinë shqiptare të viteve që vijnë po formohen pikërisht këtu.

Në Shkollën e Magjistraturës.

Faleminderit Shkollës së Magjistraturës!

Faleminderit partnerëve europianë!

Faleminderit të gjithë atyre që çdo ditë investojnë në integritetin, profesionalizmin dhe të ardhmen e drejtësisë shqiptare!

Faleminderit!